Хусусан, жорий ўқув йилида Тошкент вилоятидаги умумий ўрта таълим мактабларига 57 минг 401 нафар ўқувчининг 1-синфга қабул қилиниши режалаштирилган. Мактаб остонасига илк қадам қўяётган болаларга 13 номдаги “Президент совғаси” жамланмаси топширилиши белгиланган бўлиб, бу эзгу ташаббус давлатимиз раҳбари томонидан ёш авлоднинг таълим-тарбиясига, уларнинг интеллектуал ва маънавий ривожига қаратилган юксак эътибори ва доимий ғамхўрлигининг амалий ифодасидир. 

Ушбу совғалар босқичма-босқич барча туман-шаҳарлардаги мактабларга етказилиб, ўқув йилининг биринчи куни болаларга топширилади. Хусусан, шу кунларда Янгийўл тумани Мактабгача ва мактаб таълими бўлими тасарруфидаги 57 та умумтаълим муассасасига “Президент совғаси” жамланмаларини етказиб бериш ишлари бошланган. 

Мазкур жамланмалар 2025–2026 ўқув йилида ҳудуддаги 1-синфга қабул қилиниши кутилаётган 3 минг 721 нафар болажон учун мўлжалланган бўлиб, улар янги ўқув йилини зарур ўқув анжомлари билан бошлашларига хизмат қилади. Таъкидлаш лозим, “Президент совғаси” жамланмасидан “Алифбе” дарслиги, ёзув дафтарлари, рангли қоғозлар тўплами, расм дафтари, рангли қаламлар, елим, мактаб сумкаси ва бошқа зарур ўқув қуроллари ўрин олган. 

Муҳими, тақдим этилаётган ушбу совғалар мамлакатимизда таълим соҳасига қаратилаётган эътибор ва ёш авлоднинг сифатли билим олишига яратилаётган шароитларнинг амалий ифодасидир.