Оммавий сайёр қабуллар олдидан Бобур шаҳрида республика ишчи гуруҳи томонидан маҳаллаларда аҳоли билан мулоқотлар ташкил этиш, уларнинг муаммоларини ўрганиш ва ҳал этиш, ҳудудлар инфратузилмасини яхшилаш ҳамда бошқа ижтимоий-иқтисодий масалалар юзасидан кенгайтирилган йиғилиш ўтказилди. 

Республика Ишчи гуруҳи раҳбари – Президент маслаҳатчисининг биринчи ўринбосари Пўлат Бобожонов раислигида ҳуқуқни муҳофаза қилувчи идоралар, Халқ қабулхонаси, ташкилот раҳбарлари, республика ишчи гуруҳи аъзолари иштирок этган йиғилишда тасдиқланган режага мувофиқ жойларда амалга ошириладиган ишлар белгилаб олинди.

Қўрғонтепа тумани Жаннатбулоқ маҳалласидаги сайлгоҳда республика Ишчи гуруҳи, Халқ қабулхонаси, ҳуқуқни муҳофаза қилувчи идоралар раҳбарларининг илк оммавий сайёр қабули ташкил этилди. Унда аҳолининг яшаш ҳамда турмуш шароитлари ўрганилди. Жумладан, фуқароларнинг бандлик, тиббий муолажа, ижтимоий ёрдам, тадбиркорлик ва бошқа масалаларга оид мурожаатлари тингланди.

Муаммоларни жойида ҳал этиш мақсадида мутасаддилар томонидан фуқароларга ҳуқуқий тушунтиришлар, айрим масалаларни ҳал этиш бўйича тегишли ташкилотлар раҳбарларига топшириқ ва кўрсатмалар берилди. 

Ўрганиш ҳамда маълум вақт талаб қиладиган мурожаатлар ижроси мутасаддилар томонидан назоратга олинди.

Қўрғонтепа туманида ташкил этилган оммавий сайёр қабулга Қўрғонтепа, Жалақудуқ, Хўжаобод туманлари ҳамда Хонобод шаҳри аҳолиси қамраб олинди. 

Республика ишчи гуруҳи, Халқ қабулхонаси ва ташкилот раҳбарлари иштирокидаги бу каби оммавий сайёр қабуллар 14-16 май кунлари Асака, Андижон ва Бўстон туманларида ҳам ўтказилади. Қабулларга вилоятнинг барча туман ва шаҳарлари аҳолиси қамраб олинади.