Кадастр соҳасига оид мурожаатлар тингланди
Қашқадарё вилоятининг Деҳқонобод туманида фуқаролар ва тадбиркорларнинг кадастр соҳасидаги муаммоларини жойида ҳал этиш мақсадида сайёр қабул ташкил этилди. Давлат кадастрлари палатаси раиси ўринбосари Шавкат Олимов бошчилигида ўтказилган тадбирда 30 дан зиёд фуқаро ва тадбиркорлар иштирок этди.
Сайёр қабул давомида кадастр ҳужжатларини расмийлаштириш, ер майдонларини захирага қайтариш, кўчмас мулкка эгалик ҳуқуқини олиш каби долзарб масалалар юзасидан 30 дан ортиқ мурожаат қабул қилинди. Батафсил ўрганиш талаб этадиган мурожаатлар қонуний тартибда кўриб чиқиш учун расмийлаштирилди.
Шунингдек, тадбир давомида ҳудудларда олиб борилаётган кадастр хатлов ишлари, ҳуқуқий жараёнлар, ер ва мулк ҳуқуқларини эътироф этиш шартлари ҳамда босқичлари ҳақида кенг тушунтириш берилди. Фуқаролар ўзларини қизиқтирган саволларга мутахассислар томонидан аниқ жавоб олиш имкониятига эга бўлди.
Сайёр қабул якунида мурожаатларни ҳал этиш бўйича берилган топшириқларнинг бажарилиши назоратга олиниши ва фуқароларга қонуний асосда амалий ёрдам кўрсатилиши таъкидланди. Бундай учрашувлар аҳолининг ер ва мулк ҳуқуқлари бўйича хабардорлигини ошириш ва масалаларни тезкор ҳал этишда муҳим аҳамият касб этади.