– Очиқ мулоқот тарзида ташкил этилган тадбирда ёш тадбиркорлар тажрибали ишбилармонлар билан суҳбатлашиш, уларнинг маърузаларини тинглаш имконига эга бўлди, – дейди Ўзбекистон Республикаси Инвестициялар, саноат ва савдо вазирлиги мутахассиси Мэлс Очилов. – Бу уларнинг бизнес ғояларини ривожлантиришга туртки бўлиб, Ўзбекистон келажагини барпо этишга бўлган масъулиятини янада чуқурроқ англашга ёрдам беради. Тадбирда Инвестициялар, саноат ва савдо вазирлигига бириктирилган пойтахтимизнинг Янгиҳаёт туманидаги тўртта маҳалла ёшлари ҳам иштирок этди. Вазирлик уларга ҳар томонлама ёрдам кўрсатмоқда. Яъни уларнинг тил бўйича ўқув курсларида таҳсил олиши, таълим контрактларини тўлашда кўмаклашади, ўз бизнеси ёки ишини бошлашида зарур техникани тақдим этади. 

Тадбир доирасида маърузачилар Ўзбекистонда бизнес очиш, уни ривожлантириш ва юритишнинг ўзига хос жиҳатлари тўғрисида маълумот берди, бизнес-стратегиялар билан ўртоқлашди. Korzinka супермаркетлар тармоғи асосчиси Зафар Ҳошимов ҳам бизнесни ривожлантириш билан боғлиқ ёндашувлари хақида сўзлаб берди. 

– Бу каби учрашувларни мунтазам ўтказиш ва мақсадли аудиторияни кенгайтириш зарур, деб ўйлайман. Бунинг натижасида ёшларда олға интилиш, ривожланиш ва ўз Ватани тараққиётига ҳисса қўшиш истаги пайдо бўлади, – дейди Ивестициялар, саноат ва савдо вазирлигининг инвестиция лойиҳалари менежери Марьям Тиллаева.

Тадбир якунида тақдирлаш маросими бўлиб ўтди.