Энергия ресурсларини талон-торож қилиш ҳолатларининг олдини олиш, ресурсларини иқтисод қилиш ва етказилган зарарларни ундириш билан боғлиқ амалий ишлар давом эттирилмоқда.

Шу мақсадда Ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича Республика штаби ҳам фаолият юритмоқда.

Бош прокурор Ниғматилла Йўлдошев Тошкент вилоятининг Бўстонлиқ тумани ва Чирчиқ шаҳрида қиш мавсумига тайёргарлик ишлари, ижтимоий соҳа объектларининг энергия ресурслари билан таъминланиши аҳволини ўрганди.

Бош прокурор “Бўстонлиқ газ тўлдириш шохобчаси”га ташриф буюриб, мутасадди ташкилотларга объектни қисқа муддатда якунлаб, фойдаланишга топшириш бўйича топшириқ берди. “Бўстонлиқ кўмир омбори” фаолиятини кўздан кечириб, масъуллар зиммасига сифатли кўмир етказиб берилиши устидан назоратни кучайтириш вазифаси қўйилди.

Шунингдек, тумандаги “Шкода” нимстанциясида юкламаси юқори бўлган трансформаторни йирик қувватлисига алмаштириш бўйича мутасадди ташкилотларга кўрсатма берилди.

Шу билан бирга, тумандаги 26-мактаб ва 12-сонли оилавий поликлиникаси биноларининг куз-қиш мавсумига тайёргарлиги аҳволи ўрганилиб, биноларни давлат дастурига киритиш масаласи муҳокама қилинди.

Чирчиқ шаҳридаги туғруқ комплексининг мавсумга тайёргарлик ҳолати, биноларда электр таъминотини яхшилаш борасида масъулларга вазифалар белгилаб берилди.