Шу пайтгача Жомбой ва Иштихон туманларининг чекка қишлоқларида ўтказилган сайёр қабулларда юзлаб фуқароларнинг ҳуқуқни муҳофаза қилиш органлари билан боғлиқ мурожаатлари эшитилиб, назоратга олинди.  

Навбатдаги сайёр қабул Самарқанд туманининг Равонак маҳалласида ташкил этилди.  

Унда вилоят суди, вилоят прокуратураси, Мажбурий ижро бюроси, Адлия, Ички ишлар ва Солиқ бошқармалари раҳбарлари қатнашиб, мурожаатчиларни қабул қилди.  

Хусусан, вилоят суди раиси О.Ҳайитов ва маъмурий суд раиси Т.Файзиев ҳамда уларнинг ўринбосарлари суд органларидан нажот истаб келган фуқароларни эшитди.

Қабулда жиноят, фуқаролик, иқтисодий ва маъмурий масалалар юзасидан 32 та мурожаат қайд этилди. Бу мурожаатларнинг қонунга мувофиқ келадиганлари ижобий ҳал қилинди ва қолганларига ҳуқуқий тушунтириш берилди.  

Содир қилган жиноий қилмиши учун суд ҳукми билан жазо ўтаётган 11 нафар фуқаро вилоят суди раиси қабулида қилмишидан пушаймонлиги, тегишли хулоса чиқарганлиги, тузалиш йўлига қатъий ўтганлигини, бундан буён соғлом турмуш тарзида ҳаёт кечиришини билдириб, жазонинг ўталмай қолган қисмидан озод қилишни сўради.

Мазкур мурожаатлар асосида шу ернинг ўзида жиноят ишлари бўйича Самарқанд туман судининг сайёр суд мажлиси ташкил этилди. Сайёр судда ҳар бир ҳолат алоҳида кўриб чиқилиб, мурожаатлар ижобий ҳал этилди.

Сайёр қабуллар давом этмоқда.