Мирзаобод, Сирдарё туманлари ҳамда Гулистон ва Янгиер шаҳарларида ташкил этилган қабуллар вилоятнинг барча ҳудуд аҳолисини қамраб олди. Очиқ мулоқотлар давомида аҳоли суд, прокуратура, ички ишлар, солиқ ва божхона соҳаларида мурожаат қилиб, мутасаддилар томонидан уларнинг муаммоларига ечим изланди.

Хусусан, оммавий қабулга келган сайхунободлик Сурайё Қўшназарова доимий иш жойидан сабабсиз бўшатилганлигидан норози бўлиб судга мурожаати қилди. Қабул давомида унинг иши барча томонларни жалб қилган ҳолда кўриб чиқилиб, фуқаро даъвоси унинг фойдасига қаноатлантирилди.

Хайитқул Исмоилов 1982 йилдан 2007 йилга қадар Сирдарё вилояти “Агрокимё” корхонасида меҳнат қилган. 2021 йилга қадар унинг соғлиғига етказилган зарар туфайли ташкилот томонидан товон пуллари тўлаб келинган. 2021 йили ушбу ташкилот фаоляти тугатилганлиги сабабли товон пуллари оҳиригача тўланмай қолган. Фуқаро етказилган зарарни ундириб беришни сўраб судга мурожаат қилди. Унинг мурожаати ижобий ҳал этилиб, фуқаро фойдасига 39 миллион сўмдан зиёд товон пули ундириладиган бўлди.

Бундан ташқари, жойларда ташкил этилган сайёр судлар натижасида 11 нафар пробация рўйхатида турувчи шахсларни тайинланган жазодан шартли равишда озод этиш масалалари бўйича кўриб чиқилиб, ижобий ҳал этилди.

Тадбиркор Бобурхон Худоёров Янгиер шаҳрида хизмат кўрсатиш амалиёти билан шуғулланади. Тадбиркор кўрсатган хизмати учун 11 млн қарздорликни ундира олмаётганлиги бўйича мурожаат қилди. Қарздорликни ундириш юзасидан киритган даъвоси прокутура томонидан кўриб чиқилиб, ижобий ҳал этилди.

Вилояти Ички ишлар бошқармаси бошлиғи томонидан 18 нафар фуқаронинг масаласи жойида ижобий ҳал этилди. Мисол учун мирзаободлик Ҳабиба Қўчқорова 1995 йилда қўшни Қирғизистондан кўчиб келган, у Ўзбекистон фуқаролигини олиш бўйича мурожаат қилди. Унинг масаласи бўйича ҳам расмийлаштириш ишлари бошлаб юборилди. Отахон Воситов 2016 йил Тожикистон Республикасидан кўчиб келган. Қабуллар давомида унга доимий яшаш учун гувохнома тақдим этилди.

Мирзабоод туманида яшовчи Донохон Мамажонованинг Сирдарё вилояти Давлат солиқ бошқармаси бошлиғи қабулида бўлиб, ўзига тегишли мол-мулк солиғини қайта ҳисоблашни сўради. Бу мурожаат хам атрофлича ўрганилиб, фуқаро фойдасига қаноатлантирилди.

Сирдарё тумани “Бахмал” маҳалласида яшовчи Абдураззоқ Бурлиевнинг кадастр ҳужжатини расмийлаштириш тўғрисидаги вилоят Адлия бошқармаси бошлиғига қилган мурожаати ҳам ижобий ечим топди.

Шунингдек, оммавий қабуллар давомида ахолига сайёр давлат хизматлари ҳам кўрсатилди.

Сирдарё вилоятида давом этган суд-ҳуқуқ масалаларига оид оммавий қабулларда жисмоний ва юридик шахслардан жами 358 та мурожаат келиб тушди. Шундан 141 та мурожаат жойида ўз ижобий ечимимни топган бўлса, қолгани ўрганиш учун муддат талаб этганлиги сабабли мутасаддилар томонидан назоратга олинди.