Mahallalar uyushmasi viloyat boshqarmasi hamda Shirin shahar hokimligi hamkorligida  tashkil etilgan  mazkur seminarda Sirdaryo viloyat hokimi Akmaljon Mahmudaliyev ham ishtirok etib, “yettilik” faoliyatini samarali tashkil etish, uning mahalla hayotidagi o‘rnini oshirish va boshqa masalalar yuzasidan gapirdi.  

Nafaqat Shirinda, viloyatning barcha tumanlarida aholining bandligini ta’minlash, daromadini oshirish,  “Sayxunobod”, “Uychi”, “Zarbdor”, “G‘ijduvon” tajribalarini ommalashtirish, kam daromadli xonadonlarga 5 xil loyiha paketlarini taqdim qilish, banklar faoliyatini jonlantirish, jamoat tartibini saqlash va xavfsiz muhitni ta’minlash, fuqarolarning og‘ir ijtimoiy ahvolga tushib qolishining oldini olish, yoshlarning bo‘sh vaqtini mazmunli tashkil etish, “Sog‘lom oila — sog‘lom jamiyat” tamoyillarini targ‘ib qilish, reproduktiv salomatlikni yaxshilash kabi muhim va dolzarb masalalarga ahamiyat qaratildi.

Shu kuni davlatimiz rahbarining topshirig‘iga asosan, aholiga 23 turdagi pullik xizmatlarni ko‘rsatadigan "Nurobod" mahalla-servis kompaniyasi binosi qurilishiga start berildi, Mahallalar uyushmasi viloyat boshqarmasi, tuman va shahar bo‘limlari mas’ullari, “mahalla yettiligi”  a’zolari ishtirokida 1 gektarga yaqin maydonga 2 mingdan ziyod manzarali daraxt ko‘chati  o‘tqazilib,  "Kambag‘allikdan farovonlik sari" dasturiga muvofiq olib borilayotgan ishlar Nurobod mahallasidagi xonadonlar misolida o‘rganildi.

Muhokama etilgan masalalar yuzasidan kelgusida amalga oshiriladigan ishlar rejasi belgilab olinib, ishtirokchilarga aniq yo‘nalishlar berildi.