Bojxonachi – tadbirkorga ko‘makchi
Buxoro viloyati bojxona boshqarmasi mas’ullarining ommaviy sayyor qabuli davomida viloyatning Kogon hamda Qorako‘l tumanlarida faoliyat ko‘rsatayotgan tadbirkorlik sub’ektlari hamda tashqi iqtisodiy faoliyat ishtirokchilarining sohaga oid muammolarini o‘rganish, ularga amaliy ko‘mak berish maqsad qilindi.
Masalan, Kogon shahridagi o‘rganish ishlari davomida “BUXORO GYPSUM” MCHJ mutasaddilarining murojaati, Buxoro viloyati bojxona boshqarmasi boshlig‘i Bahodir Qutlimuratov tomonidan tinglandi.
Murojaatchining “Vakolatli iqtisodiy operator” maqomini olish bo‘yicha qilgan murojaatiga javoban shu yerning o‘zida u bilan birgalikda tegishli tartibda hujjatlar rasmiylashtirildi. Qisqa fursatli o‘rganish ishlaridan so‘ng, unga “Vakolatli iqtisodiy operator” maqomini olishi mumkinligi aytib o‘tildi.
Ma’lumot uchun: “BUXORO GYPSUM” MCHJ 2017 yilda tashkil etilgan. Korxona asosan qurilish mahsulotlari ishlab chiqarishga ixtisoslashgan. Joriy yil hisobida korxona tomonidan 2,9 ming tonna xom-ashyo qayta ishlash maqsadida xorijdan olib keltirilgan. 2023 yilning o‘tgan davri mobaynida umumiy qiymati 4 million dollarga teng bo‘lgan tayyor mahsulotlar Tojikiston, Afg‘oniston, Qozog‘iston va Turkmaniston davlatlariga eksport qilingan.
Bojxona organi xodimlarining mazkur korxona vakillari bilan bo‘lib o‘tgan so‘nggi uchrashuvlarida bojxona hududida qayta ishlash bojxona rejimining afzalliklari yuzasidan tushuntirish ishlari ham olib borilgan.