“Dolzarb 40 kunlik” qizg‘in pallada
![News Image](https://pm.gov.uz/uploads/8a8026ae-65d5-5ee7-fb77-df6192979721_news_.jpg)
Ayni kunlarda Sirdaryo viloyatida ham “Yashil makon” umummilliy loyihasi doirasidagi “Dolzarb 40 kunlik” qizg‘in pallaga kirdi.
Prezidentimiz tashabbusi bilan amalga oshirilayotgan “Yashil makon” umummilliy loyihasi doirasida Sirdaryoda ham obodonlashtirish, ko‘kalamzorlashtirish, ko‘chatlar ekib bog‘ yaratish ishlari keng quloch yozdi. Ushbu tadbirlarda barcha insonlar – keksayu yosh faol ishtirok etib, ko‘chalar, ko‘p qavatli uylar atrofi va mahallalar hududida ko‘chatlar ekilmoqda.
Viloyat hududida joriy yilning kuz mavsumida 5 million. 987 ming tup ko‘chat ekilishi rejalashtirilgan. Ekilgan ko‘chatlarni sug‘orish ishlarini yaxshilash maqsadida tuman va shahar obodonlashtirish boshqarmalari ob’ektlariga 11 ta suv chiqarish qudug‘ini qazish hamda 14 kilometr uzunlikda sug‘orish tizimini yaxshilash ishlarini amalga oshirish belgilangan.
–Viloyatning 3 ta shahar va 8 ta tumanidagi 12 gektar maydonda maxsus sug‘orish tizimlarini tashkil qilgan holda 11 ming tup daraxt ko‘chati ekilishi rejalashtirilgan, – deydi viloyat Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i Ikromjon Tagayev. – Bundan tashqari, Sirdaryo viloyati “Yashil hudud” DUK tomonidan viloyatning tuman va shaharlarida 21,4 gektar maydonda maxsus sug‘orish tizimi yaratilgan. “Yashil bog‘”lar tashkil etilib, 6 ming 730 dona ko‘chat ekilishi mo‘ljallanmoqda.
Viloyatda “Yashil makon” umummilliy loyihasining kuzgi mavsumi doirasida joriy yilning 9 noyabr holatiga ko‘ra 335 ming 700 tup mevali va manzarali ko‘chat ekildi.
Shuningdek, viloyatning shahar va tuman hokimliklari tomonidan o‘z hududlarida “Hokimlik bog‘lari” hamda yirik sanoat korxonalari tomonidan “Yashil belbog‘lar” tashkil etilishi rejalashtirilgan bo‘lib, bugungi kunda ushbu ishlar uyushqoqlik bilan amalga oshirilmoqda.