Ҳар бир мурожаат ортида инсон тақдири, унинг муаммолари ва кутилган ечим мавжуд экан, Мажбурий ижро бюроси органлари ходимлари ҳам бу борада масъулиятни янада ошириб, мурожаатларни чуқур ўрганиш ва адолатли ҳал этишга алоҳида эътибор қаратиб келмоқда.

Жорий йилнинг ўтган даври давомида бюронинг Навоий вилоят бошқармаси томонидан 9 минг 410 та мурожаат кўриб чиқилди. Уларнинг 8 минг 89 таси ҳал этилган бўлиб, 5 минг 737 та мурожаат қаноатлантирилган. Бу кўрсаткич умумий мурожаатларнинг 66 фоизини ташкил этади. Энг муҳими, мурожаатларни ҳал этиш жараёнида 40 миллиард 914 миллион сўм миқдоридаги маблағ ундирилиб, 5 минг 412 нафар фуқаронинг ҳуқуқлари тикланган.

– Мурожаатларни амалда ҳал этиш бўйича натижалар орасида ҳуқуқий характерга эга масалалар муҳим ўрин тутади, – дейди бюронинг Навоий вилояти бошқармаси бошлиғи Баҳром Тоштемиров. – Масалан, фуқаролик ишлари бўйича Кармана туманлараро судининг ижро варақасига асосан қарздор “Н.С.Б”дан ундирилувчи К.М. фойдасига 521 миллион 49 минг 418 сўм иш ҳақини ундириш юзасидан бюронинг Навоий шаҳар бўлими томонидан олиб борилган ижро ҳаракатлари бунинг яққол мисолидир. Олиб борилган саъй-ҳаракатлар натижасида қарз тўлиқ ундирилиб, фуқаронинг ҳақ-ҳуқуқлари тикланди.

Аҳоли билан юзма-юз мулоқотлар ҳам мурожаатлар самарадорлигини оширишда муҳим аҳамият касб этмоқда. Сайёр қабуллар давомида 414 нафар фуқаронинг муаммолари жойида ҳал этилди. 

Бюро органлари томонидан олиб борилаётган ушбу тизимли фаолият аҳоли мурожаатларини изчил ўрганиш, муаммоли масалаларни жойида ҳал этиш ва адолатни таъминлашда муҳим омил бўлиб хизмат қилмоқда. Инсон манфаатларини эъзозлаш, ҳар бир мурожаат ортидаги тақдирга бефарқ бўлмаслик эса бу йўналишдаги ишларнинг асосий мезони бўлиб қолмоқда.