Ана шундай ташаббуслардан бири – Ижтимоий ҳимоя миллий агентлиги ва протез-ортопедия маҳсулотлари ишлаб чиқарувчи корхоналар ҳамкорлигида амалга оширилаётган “Мослаштириш маркази” ижтимоий лойиҳасидир.

“Мослаштириш маркази” лойиҳасининг асосий мақсади давлат кўмаги остида замонавий протез воситалари билан таъминланган ногиронлиги бўлган фуқароларнинг ҳаёт сифати ва ижтимоий фаоллигини ошириш, шунингдек, мазкур воситалардан фойдаланиш кўникмасини шакллантиришдир. Баъзи фуқаролар янги протез воситаларини олган бўлса-да, улардан самарали фойдалана олмаслиги натижасида кундалик ҳаётда тўлиқ ҳаракатлана олмайди. Лойиҳа айнан ана шундай муаммолар ечимига қаратилган.

Лойиҳанинг биринчи босқичи Қашқадарё вилоятида амалга оширилмоқда. Ҳозирда вилоятнинг Яккабоғ туманидаги ижтимоий қўллаб-қувватлаш марказида протез воситалари тақдим этилган 15 нафар ногиронлиги бўлган фуқарога мутахассислар томонидан махсус мослаштириш машғулотлари ташкил қилинмоқда. Бу машғулотлар 10 кун давом этар экан, ҳар бир иштирокчининг шахсий эҳтиёжлари инобатга олинган ҳолда, индивидуал ёндашув асосида амалга оширилмоқда.

Марказда иштирокчилар нафақат техник жиҳатдан мослашиш имкониятига, балки стационар ижтимоий ва реабилитация хизматларидан ҳам фойдаланиш ҳуқуқига эга. Улар учун махсус яшаш жойлари, психологик ва тиббий ёрдам, ижтимоий маслаҳатлар ҳам ташкил этилган. Бу эса лойиҳа доирасида фуқароларнинг жисмоний мослашуви билан бир қаторда, уларнинг руҳий ва ижтимоий қайта тикланишини ҳам таъминлашга хизмат қилади.

Ижтимоий ҳимоя миллий агентлиги томонидан маълум қилинишича, “Мослаштириш маркази” лойиҳаси келгусида бошқа ҳудудларда ҳам йўлга қўйилиши режалаштирилган. Бу эса юртимиздаги кўплаб имконияти чекланган шахслар учун янги имконият эшикларини очиши билан бирга, уларнинг жамиятга тўлиқ интеграциялашувига хизмат қилиши билан аҳамиятлидир.