Вилоят солиқ бошқармаси томонидан тадбиркорлар фаолиятидаги муаммоларни аниқлаш ва уларга ечим топиш мақсадида очиқ мулоқотлар ташкил этилмоқда. Навбатдаги учрашув Муборак туманида ўтказилди.

Вилоят солиқ бошқармаси бошлиғи Сирожиддин Эшматов иштирокида ўтган учрашувда тадбиркорлар солиқ ҳисоботларини топшириш, имтиёзлардан фойдаланиш ва бошқа долзарб масалаларни муҳокама қилишди. Айрим мурожаатлар шу ерда ҳал этилган бўлса, айримлари вақт ва ўрганиш талаб қилиб, аниқ муддат ва масъуллар белгилаб олинди.

Муборак туманидаги “Муборак конкрет” масъулияти чекланган жамияти вакили Бойтура Собиров қишлоқ хўжалиги ери билан боғлиқ муаммоларни кўтариб, солиқларнинг ортиқча ҳисобланганини билдирди. Мазкур масала бўйича амалий ёрдам кўрсатиш учун топшириқлар берилди.

Учрашув сўнггида солиқ қонунчилигидаги янгиликлар ва имтиёзлар ҳақида маълумотлар берилди, иштирокчиларнинг саволларига жавоб қайтарилди.