Ёшлар ишлари агентлиги, Спорт, Соғлиқни сақлаш,  Олий таълим, фан ва инновациялар вазирликлари, Ташқи меҳнат миграцияси агентлиги, Камбағалликни қисқартириш ва бандлик вазирлиги, Марказий банк, “Асака банк” ҳамда “Алоқа банк”, шунингдек, соҳага масъул бошқа идораларнинг вакиллари иштирокида ўтган учрашувда 180 нафар ёш ва уларнинг ота-оналари қатнашди.

Сўнгги йилларда давлатимиз раҳбарининг ташаббуси билан мамлакатимизда ёшлар масалалари давлат сиёсати даражасигача кўтарилиб, ушбу йўналишга эътибор нақадар муҳим эканлигини ҳаётнинг ўзи кўрсатмоқда. Бугун юртимизда ёшларга қаратилаётган эътибор ва ғамхўрлик боис, эртамиз умидлари илм-фан, маданият, спорт соҳасида мамлакатимиз довруғини юқорига кўтариш мақсадида астойдил ҳаракат қилишаётганлиги, бу борада уларга ҳар жабҳада елкадош раҳбарлар борлиги алоҳида таъкидланди.

Жумладан, ёшларни қўллаб-қувватлашда ички ишлар органлари ходимлари билан бир қаторда ҳамкор ташкилотларнинг “Маҳалла еттилиги” билан бирга ишлаш механизми яратилган бўлиб, ҳар бир ёшнинг муаммоси хонадонма-хонадон юриб ўрганилмоқда.  

Масъул раҳбарлар ҳар ойда камида бир маротаба ўзларига бириктирилган ёшлар билан учрашиб, уларнинг салоҳиятини юзага чиқаришга, талаб юқори бўлган касб-ҳунарга ўқитиш орқали бандлигини таъминлашга, ҳуқуқий онги ва маданиятини юксалтиришга ҳар томонлама кўмаклашмоқда.

Учрашувда ёшлар томонидан янги ташаббус ва таклифлар билдирилди. Айниқса, уларнинг саволларига ҳамда мурожаатларига масъуллар томонидан алоҳида эътибор қаратилди.  

Ёшлар ва уларнинг ота-оналари томонидан жами 79 та мурожаат келиб тушган бўлиб, уларнинг барчаси қаноатлантирилди. 47 нафар ёшга уларнинг қизиқишидан келиб чиқиб, тадбиркорлик фаолиятини бошлаш учун зарур ускуна, анжомлар ва компьютер жамланмалари топширилди. Учрашувда фаол иштирок этган 30 нафар ёшга эсдалик совғалари ва китоб жамланмалари берилди..