Mamlakatimizda inson qadrini ulug‘lash, xalqning dardu tashvishlarini o‘z vaqtida o‘rganib, ijobiy hal etish ustuvor vazifaga aylangan. Sayyor qabullar esa joylarda o‘rganilgan muammolar ijrosini ta’minlash va nazorat qilishning eng maqbul yechimidir. Kundalik hayotda shunday muammolar ham uchraydiki, uning yechimi oddiy fuqaro tugul, butun bir mahalla ahlini ham o‘ylantirib qo‘yishi mumkin. 

Misol uchun, mahallangizdan oqib o‘tuvchi zovur, ya’ni zahkashning suvi oqmay qolsa, kimga va qanday murojaat qilasiz? Shovot tumanidagi Asavey mahallasi ahlini ham ushbu savol ozroq tashvishga soldi. Biroq mahalladoshlari nomidan kelgan vakillar viloyat hokimi bilan uchrashgach muammoga yechim topildi. 

– Mahallamizdan oqib o‘tuvchi zovur bir yildan buyon oquvdan to‘xtagan, – deydi mahalla faoli Hikmat Madaminov. –Bog‘ va dalalarda yer osti sizot suvlari ko‘tarilib bormoqda. Ekinlarga ham salbiy ta’sir ko‘rsatmoqda. Zovurning yo‘l ostidan o‘tuvchi qismiga 35-40 metrlik quvur o‘rnatish kerak. Shu masalada viloyat hokimi bilan uchrashdik. U tegishli mutasaddilarga zarur topshiriqlarni berdi. Mahallamiz ahli bundan juda xursand. Yer osti suvlari pasaysa, aholimiz dasturxoniga dehqonchilik mahsulotlarimizni yanada ko‘proq yetkazib beramiz. 

Qabul davomida fuqarolarning ijtimoiy-maishiy masalalar yuzasidan talab va takliflari, ariza va shikoyatlari o‘rganildi. Mavjud muammolarning aksariyati daxldor idoralar, tuman va shahar hokimliklari vakillari ishtirokida hal etildi. Shuningdek, muloqot davomida ko‘plab fuqarolarga ularni qiziqtirayotgan masalalar bo‘yicha huquqiy tushuntirish va maslahatlar berildi.