Yo‘qdek yashagan insonga maqom berildi
Guliston shahridagi “Inson” ijtimoiy xizmatlar markazi ko‘magi bilan uzoq yillar hech qanday shaxsini tasdiqlovchi hujjatsiz yashab kelgan 70 yoshli Zulfat Muhammediyanovga fuqaroligi bo‘lmagan shaxs maqomi rasmiylashtirildi. Endi u davlat xizmatlari, ijtimoiy yordam hamda tibbiy xizmatlardan to‘laqonli foydalanish imkoniyatiga ega.
2024 yil 19 noyabr kuni O‘zbekiston Respublikasi Prezidenti huzuridagi Ijtimoiy himoya milliy agentligi rahbariyati tomonidan o‘tkazilgan sayyor qabulda fuqaro Sevara Qurbonova o‘zining og‘ir hayotiy ahvolda qolgan tog‘asi — Zulfat Muhammediyanovga amaliy yordam so‘rab murojaat qildi.
Mazkur murojaat asosida “Inson” markazining huquqiy masalalar bo‘yicha eksperti tomonidan Zulfat Muhammediyanovning tug‘ilganlik guvohnomasini tiklash uchun Boshqirdiston Respublikasiga so‘rovnoma yuborildi. Shu bilan birga, u Rossiya Federatsiyasining O‘zbekistondagi elchixonasiga olib borilib, konsul qabuli uchun elektron navbatga qo‘yildi. O‘zbekistonda yashash guvohnomasini olish jarayonida adliya va ichki ishlar idoralari bilan hamkorlikda tegishli huquqiy asoslar shakllantirildi.
– U kishi faqat shaxsiy emas, balki ijtimoiy va iqtisodiy huquqlardan ham mahrum bo‘lgan edi, – deydi “Inson” markazi huquqiy masalalar bo‘yicha ekspert-maslahatchisi O‘lmas Jo‘raboyev. – Biz uning shaxsiy ma’lumotlarini tiklab, Rossiyadagi tug‘ilganlik guvohnomasini rasmiylashtirish va O‘zbekistonda fuqaroligi bo‘lmagan shaxs sifatida yashash guvohnomasini olish ishlarini amalga oshirdik.
Fuqaroligi bo‘lmagan shaxs maqomi berilgach, Zulfat Muhammediyanov nafaqa, tibbiy yordam va boshqa ijtimoiy xizmatlardan foydalanish huquqini qo‘lga kiritdi.
– Menga hayotimni qaytarishdi. Bir paytlar ismimni hech qayerda yozolmasdim. Endi esa o‘z nomim, o‘z huquqlarim bor, – deydi u samimiy minnatdorlik bilan.