Ta’mirga muhtoj, og‘ir sharoitli hududlar o‘rnida obod maskanlar qad rostlamoqda
Davlatimiz rahbari topshirig‘iga asosan tuzilgan Respublika ishchi guruhi boshchiligida “Obod xonadon – obod ko‘cha – obod mahalla” mezonlari bo‘yicha davom etayotgan ishlar zamirida elimizning mehri, roziligi va duosiga sazovor bo‘lishdek ezgu maqsadlar yotadi.
Respublikaning tanlangan 56 ta “qizil” toifadagi mahallasida Prezident Administratsiyasi, Xalq qabulxonalari, tegishli vazirlik va idoralar hamda viloyat sektor rahbarlaridan iborat shtablar tuzildi. Har bir mahalla kesimida esa qilinishi kerak bo‘lgan ishlar belgilab olinib, jadal amalga oshirilmoqda.
Xususan, o‘tgan ikki yarim oy mobaynida 3,5 mingdan ziyod uy-joyi ta’mirga muhtoj va o‘ta og‘ir sharoitda yashayotgan fuqarolarning turar joylari joriy va kapital ta’mirlab berildi, 900 ga yaqin xonadonga kadastr hujjatlari rasmiylashtirildi.
Dastur doirasida mahallalardagi 571 ta ko‘chada infratuzilma holatini yaxshilash maqsadida asfalt, shag‘al, betonlash ishlari qilinib, piyodalar yo‘lagi barpo etildi.
Obod maskanlar tunlari ham charog‘on bo‘lishi uchun yangi elektr tarmoqlari tortilib, mingdan ziyod yoritish moslamalari, yangi transformator o‘rnatildi, 5 mingdan ziyod simyog‘och ustunlari beton ustunlarga almashtirildi.
Qishki mavsumga tayyorgarlik jarayonlarida, eng muhimi, joylarda gaz ta’minotini yaxshilashdir. Olib borilayotgan ishlar natijasida 119 ta gaz taqsimlash punkti ta’mirlanib, yangi tabiiy gaz tarmog‘i tortildi. Aholi talabidan kelib chiqib, 12 mingdan ziyod qo‘shimcha suyultirilgan gaz ballonlari va ko‘mir yetkazib berildi.
Ichimlik suvi ta’minoti borasidagi ishlar ko‘lami ham rejaga ko‘ra amalga oshirilib, 183 kilometr uzunlikdagi yangi suv tarmoqlari tortilib, ta’mirtalablari sozlandi. Shuningdek, yangi ichimlik suvi inshootlari o‘rnatildi. Mavsumga tayyorgarlik ko‘rish maqsadida 21 ta ko‘p qavatli uyning tom qismi, 59 tasining kirish yo‘laklari ta’mirlandi.
Obodonlashtirish ishlari olib borilayotgan hudud aholisining muhtoj qatlamiga ijtimoiy yordamlar ko‘rsatish masalalari ham Respublika ishchi guruhi e’tibori markazida bo‘ldi.
Jumladan, 1,1 ming nafar “Temir daftar”, “Ayollar daftari” va “Yoshlar daftari”dagilarga 2 milliard 680 million so‘mlik turli yordamlar ko‘rsatildi. Ikki yuzdan ziyod fuqaroga nogironlik aravachasi, protez-ortopediya vositalari yetkazildi. Yetti mingdan ziyod aholiga bepul dori-darmon vositalari ajratildi. Mingga yaqin fuqaroga esa 15 milliard so‘mlik imtiyozli kredit, to‘rt yuz nafarining subsidiya olishiga ko‘maklashildi.
Shu bilan birga, o‘z hunarining ortidan mehnat qilishni istagan 206 nafar xotin-qizga tikuv mashinasi va 139 nafar fuqaroga asbob-uskuna va mehnat qurollari olib berildi.
Aholi salomatligini yaxshilash maqsadida tashkil etilayotgan tibbiy ko‘riklar natijasida o‘z salomatligidan xavotir olish kabi holatlarga barham berilmoqda. Xususan, 116 mingdan ziyod shaxs bunday imkoniyatdan foydalangach, 838 nafariga davolanish uchun orderlar ajratildi, sihatgoh, sanatoriy va profilaktoriyalarga yo‘llanma berildi, yakka yolg‘iz keksalar, nogironlarga turli yordamlar ko‘rsatildi.
Mahallalarda ma’naviy muhitni yaxshilash borasida olib borilayotgan ma’rifiy va sport tadbirlari hamisha aholiga manzur bo‘lgan. Shu ma’noda 10 mingdan ziyod turli tadbirlar xonadon madaniyatini yuksaltirish, obod va ko‘rkam qilish, farzand tarbiyasi, ma’naviyat va kitobxonlikni targ‘ib qilish kabi yo‘nalishlarda bo‘ldi.
Aynan shu kabi targ‘ibot, tashviqot va tushuntirish ishlari natijasida 245 ta oiladagi notinch va nizoli holatlar jamoatchilik aralashuvi bilan bartaraf etildi.
Ezgu ishlar davom etmoqda.