Prezidentimiz tashabbusi bilan amalga oshirilayotgan ushbu dastur asosida viloyat hokimligi, respublika ishchi guruhi, umuman, barcha mutasaddi va mas’ul tashkilotlar vakillari tomonidan mahallalarda olib boriladigan qurilish, obodonlashtirish hamda targ‘ibot ishlari yuzasidan rejalar ishlab chiqilib, amaliy ishlar olib borilmoqda.  

Jumladan, ana shu ishlar natijasida Izboskan tumanidagi Guliston mahallasi haqiqiy gulistonga aylanmoqda. Ayni kunda mazkur mahalladagi 756  xonadon, 1 ming 273 oila tarkibida 3 ming 900 nafarga yaqin aholi istiqomat qiladi. Ularning 2 ming 300 nafardan ortig‘i xotin-qizlardir. Mahalladagi har bir ko‘cha, xonadonda obodonlashtirish, shuningdek, tabiiy gaz, ichimlik suvi hamda elektr energiyasi ta’minotini yaxshilash bo‘yicha amaliy ishlar olib borilmoqda. Bundan kattayu kichik behad xursand.  

Tuman tibbiyot birlashmasi shifokor va hamshiralari, ko‘cha boshilar, mahallaning "Oqila ayollar" harakati faollari mahalladagi har bir xonadonga kirmoqda, ular bilan suhbatlar o‘tkazmoqda, salomatliklarini tekshirmoqda. Bundan tashqari, aholi vakillari ishtirokida sog‘lom turmush tarzi ko‘nikmalarini shakllantirish, xonadonlar pokizaligi va ozodaligini saqlash, fuqarolarning tibbiy va huquqiy savodxonligi yuksaltirishga qaratilgan targ‘ibot tadbirlari ham o‘tkazilmoqda.  

Mahalladagi ijtimoiy soha ob’ektlarini ta’mirlash, obodonlashtirish bo‘yicha ham ishlar belgilangan. Viloyat hokimi Shuhratbek Abdurahmonov hududdagi 30-umumta’lim maktabida bo‘lib, ushbu maktabni rekonstruksiya qilish, faollar zalini ta’mirlash bo‘yicha mas’ullarga topshiriqlar berdi. Maktabning bitiruvchi sinf o‘quvchilari bilan bo‘lgan suhbatda o‘z tadbirkorligini boshlamoqchi bo‘lgan 11-sinf o‘quvchilari Shohista Kozimjonova va Farzona Shuhratovaga universal tikuv mashinalari topshirdi. Endi ular darsdan keyin o‘z xonadonida tikuvchilik bilan shug‘ullanish, daromad topish imkoniga ega bo‘ldi.  

Umuman, mahallada dastur doirasida amalga oshirishi belgilangan keng ko‘lamli ishlar qizg‘in davom etmoqda.